سامي و سهام
سهام : انتي عايزاني يا عايدة انسب لسامي طفل مش ابنه ؟!! دي تبقي جريمة !!!
عايدة : يبقي مفيش حل الا انك تطلقي من سامي وتتجوزي وائل .
سهام : معقول !! هغير حياتي كلها علشان غلطة واحدة ؟!!
عايدة : متزعليش مني يا سهام غلطتك مش بسيطة ، وادعي ربنا انك تخرجي منها علي خير .
سهام : يارب ، ادعيلي يا عايدة .
عايدة : بدعيلك من قلبي يا سوسو .
سهام : تفتكري لو انا اتطلقت من سامي ممكن وائل يتجوزني ؟
عايدة : مش بتقولي انه بيحبك يبقي لازم يتجوزك .
سهام : مش عارفة يا عايدة .
عايدة : مش عارفة اي بالظبط ؟
سهام : مش عارفة اي حاجة حاسة اني متلخبطة ومش قادرة افكر .
عايدة : فكري بسرعة وقرري ولو اخترتي انك تطلقي من سامي وتتجوزي وائل قوليلي وسيبي الباقي عليا .
سهام : هتعملي اي ؟
عايدة : هساعدك لغاية ما تتجوزيه .
سهام : ولو رفض ؟؟
عايدة : مش بمزاجه يقبل ولا يرفض ، مادام غلط لازم يصلح غلطته .
وبعد يومين سهام كلمت عايدة وقالتلها : انا خلاص فكرت وقررت .
عايدة : ها ، قررتي اي ؟
سهام : قررت اتخلص من الجنين .
عايدة : بتهزري !!
سهام : لا انا بتكلم جد .
عايدة : لكن ده فيه خطورة علي حياتك !!
سهام : مش مهم ، الخطورة نسبتها ٥٠% ولو اموت احسن ما اعيش بالمصيبة دي ، لما ادفع انا تمن غلطتي احسن ما غيري يدفعها .
عايدة : هاتي رقم وائل يا سوسو .
سهام : ليه ؟
عايدة : هاتي الرقم وانتي هتعرفي .
عايدة اتصلت بوائل وكلمته : صباح الخير .
وائل : صباح النور. يا فندم .
عايدة : حضرتك الاستاذ وائل .
وائل : ايوه ، مين معايا ؟
عايدة : انا عايدة صحبة سهام وتقدر تقول اختها .
وائل : اه ، اهلا بيكي .
عايدة : كنت عايزة حضرتك في موضوع مهم .
وائل : اؤمريني .
عايدة : لا مش هينفع في التليفون لازم نتقابل .
وائل : طيب ممكن اعرف الموضوع اللي عايزة تكلميني فيه ؟
عايدة : خير ان شاء الله لما نتقابل هتعرف .
وائل : يعني مش هينفع تقولي الموضوع اللي هنتكلم فيه ؟
عايدة : حاجة بخصوص سهام ، نتقابل النهارده ونتكلم ، نتقابل امتي ؟
وائل : بعد ساعتين من دلوقتي .
عايدة : تمام ابعتلي لوكيشن المكان اللي هنتقابل فيه ، بس ميكونش الكافيه عندك .
وائل : اه ، ده انتي عرفتي كل حاجة بقي ؟
عايدة : لما نتقابل نتكلم احسن .
وائل : حاضر .
بعد ساعتين جلست عايدة مع وائل وفاجئته : بدون مقدمات كتير هجيبلك من الاخر ، سهام حامل .
وائل : وفيها اي !! الف مبروك .
عايدة : مش لما تعرف حامل من مين ؟
وائل : اكيد من جوزها طبعا .
عايدة : لا ، حامل منك انت يا استاذ وائل .
وائل ” بارتباك ” : يعني اي حامل مني انا ؟؟
عايدة : كلامي مفهوم ، حامل منك واللي في بطنها ابنك او بنتك .
وائل : انتي اكيد جاية تهزري .
عايدة : يا استاذ انا جايالك في مصيبة مش جاية اهزر معاك .
وائل : هي حامل من جوزها ، انا مش لي اي علاقة بالموضوع ده .
عايدة : لا ، سهام لما عرفت انها حامل شكت ان الحمل منك وعملت تحليل واتأكدت وانا كنت معاها .
قام وائل وقف وقالها : الموضوع ده انا معرفش عنه حاجة ، وبعدين صحبتك قطعت علاقتها بيا ولا متعرفيش كده ؟؟
عايدة : كل الكلام ده دلوقتي مش مهم ، المهم انها مش هينفع تنسب الطفل اللي هييجي لأب مش ابوه .
وائل : انا مش معترف بكل اللي بتقوليه ده ومش ليا اي علاقة به .
عايدة : وترضي ابنك يتربي في حضن واحد تاني ويفتكر انه ابوه ؟؟
وائل : انا مش ليا اي علاقة بالحمل ده ولو هي اتأكدت انه مش من جوزها تروح تدور تشوف ابوه مين .
عايدة : قصدك اي ؟
وائل : قصدي اللي تفرط في شرفها مع واحد ممكن تعمل كده مع اي حد .
عايدة : هي وافقت علي اللي حصل في لحظة ضعف وعلشان بتحبك .
وائل : واللي تحب واحد غير جوزها وتعمل معاك كده ممكن تكون بتحب غيره كتير وتعمل معاهم كلهم كده .
عايدة : سهام ست محترمة مش بتاعت الكلام ده .
وائل ” بضحكة عالية ” : ايوه انا عرفت كده بنفسي .
عايدة : هي فعلا غلطت علشان حبت ووثقت في حد زيك .
وائل : احترمي نفسك احسنلك .
عايدة : بص يا استاذ وائل من الاخر لو مش اعترفت ان الجنين ده ابنك هتدخل نفسك في مشاكل انت مش قدها .
وائل : انتي بتهدديني ؟؟
عايدة : لا مش تهديد تقدر تعتبرها نصيحة .
وائل : طيب والمطلوب مني اي ؟
عايدة : لازم تقف جنبها وتشوف ممكن تتصرفوا ازاي في المشكلة دي .
وائل ” بضحكة عالية ” : متكونش صاحبتك عايزاني اتجوزها ؟!!
عايدة : لو مفيش حل غير كده يبقي لازم تتجوزها .
وائل انا مفيش في ايدي حاجة اعملها ثم اني متجوز ومش عايز اتجوز تاني ، خليها تتخلص من الجنين .
عايدة : هي ذاتها عايزة تعمل كده لكن للأسف مش هينفع ، في خطورة كبيرة علي حياتها .
وائل ” بغضب ” : هاتي من الأخر عايزة اي ؟؟؟
عايدة : انت لازم تتجوزها .
وائل : قولتلك مش هتجوز ، وبعدين بلاش لغة التهديد دي علشان لو استفزتيني اكتر من كده ممكن صحبتك تندم اوي اوي .
عايدة : قصدك اي ؟ بقلم/ عادل عبد الله
وائل : مش مهم قصدي المهم شوفي انتي عايزة اي غير موضوع الجواز ده لأنه مش هيحصل .
عايدة : انا كلامي خلص ومعاك فرصة يومين ومعاك رقم تليفوني ياريت مش تتأخر عليا في الرد .
رجعت عايدة لسهام وقالتلها علي حوارها مع وائل لكن حافظت علي مشاعرها علي كلامه عنها بأنها ممكن تكون عملت علاقات مع رجال اخرين .لكن قالتلها علي رفضه الزواج منها !!! وحينها ظهر علي ملامح سهام الحزن الشديد علي حبها لوائل وخطيئتها معه !!!
سهام : ليه طلبتي منه انه يتجوزني يا عايدة ؟
عايدة : علشان ده يمكن الحل الوحيد لمشكلتك .
سهام : لا يا عايدة ، انا مش هتجوز وائل وهعمل عملية اجهاض بدون ما سامي يعرف ولو ربنا كتب لي العمر هتوب وهفضل استغفر ربنا علي اللي حصل ده طول عمري وهخلص لسامي بجد ، ومش ممكن اغلط الغلطة دي تاني ابدا ولا حتي اتكلم ولا ادي فرصة لأي شاب او رجل انه يطمع فيا ، ولو دي كانت نهايتي ومت وانا بعمل العملية هيكون افضل مليون مرة من اني اغش سامي الرجل اللي حبني بجد وعايش حياته في شقاء وتعب علشاني انا وولادي .
عايدة : رغم اني خايفة عليكي اوي من العملية لكن فرحانة اوي بتوبتك .
سهام : انا دلوقتي محتاجة دكتور كويس علشان العملية ، وكمان محتاجة تساعديني بفلوس العملية علشان مش. هينفع اطلبهم من سامي ولو ربنا كتب لي العمر هسددهم ليكي ولو مت ابقي سامحيني يا عايدة .
عايدة : بالنسبة للدكتور هشوف دكتور كويس وثفة ، وبالنسبة للفلوس انا طبعا تحت امرك يا حبيبتي والفلوس اللي عايزاها ممكن تكون عندك بكره الصبح ، لكن لازم اللي يدفع الفلوس دي يبقي وائل ، وكمان لازم هو اللي يمضي الاقرار اللي الدكتور هيطلبه قبل العملية .
