رواية دموع الحرمان كاملة
وانا طلعت حامل في توأم والحمل كويس
_ الف مبروك يا بسنت وشك حلو علينا اهوه…
روحنا البيت وكل الي فالبيت مكنوش مصدقين وفرحتهم ان كوثر حامل غلبت علي فرحتهم ان بسنت هتجيب توأم …
وكان باين فعيون بسنت الغيرة والغيظ …
كنا قاعدين كلنا مع بعض نتعشي فا قولت لحماتي
_ معلش بقي ياماما الدكتور قال ان حملي ضعيف اوي وعاوزني ارتاح انا هروح لماما تخدمني مش عاوزه اتقل عليكم هنا…
= تتقلي ايه يابنتي انا اخدمك بعيني انتي طول عمرك شيلاني …
وبعديت تعبت انا سلفتك موجوده…
… سلفتها مين انا حامل في توأم يعني مستحيل اقدر اعمل اي حاجه وبعدين انا لسه عروسه جديده يعني مش هاروح اقعد مع ماما عشان ما يصحش اسيب بيتي في اول الجواز كده انا لسه متجوزه من شهر
_ يعني ايه يا بسنت انت عايزه الست الكبيره هي اللي تخدمك ولا انا اللي الدكتور قال لي ان حملي ضعيف قدامك خلي حد من اهلك يجي يقعد معاكي يخدمك او خلي جوزك يجيبلك شغاله انا عن نفسي هاروح اقعد مع ماما
= حلوه فكره الشغاله دي وكوثر احنا نجيب شغاله تخدمنا كلنا وتاخذ الفلوس اللي هي عايزاها وما تمشيش وتروحي لمامتك وتسيبينا البيت هيبقى وحش من غيرك
_ الي تشوفيه يا ماما …
تاني يوم اتفقوا مع واحده تيجي تقيم معانا وتعمل الاكل وتنضف ال ٣ شقق عشان نرتاح …
كنت بتابع كل اسبوعين والدكتور بيطمني ….
وبسنت كانت بتيجي معايا تتابع هي كمان وفكل مرة تسأله علي نوع الجنين عندي وعندها هتموت وتعرف وانا مكنتش حاطه في دماغي اي حاجه كل الي يجيبه ربنا كويس …
الدكتور قالنا ان المرة الجايه ان شاء الله هيقولنا النوع …
واحنا خارجين لقيت بسنت بتقولي
_ انا كده كده واثقه اني هجيب ولد وبنت او ولدين انا حامل في توأم …
= يا بسنت ربنا يديكي الي بتتمنيه انا بس عاوزه اجيب طفل سليم معافي سواء ولد او بنت…
_ انتي دانتي تلاقيكي هتم@وتي عالولد عشان تكوشي علي كله …
ولقيتها بتضحك وكأنها بتتكلم بهزار لكن هو ده الكلام الي كان جواها …
عدت الايام وميعاد الدكتور جه ورايحين متشوقين نعرف هنجيب ايه قعدت بسنت اول واحده والدكتور كشف وقالها….
_ انتي حامل في….
انا شايف قدامي بنت اهي ماشاء الله …
لقيت بسنت وشها اتقلب وبتقول للدكتور يعني مفيش ولد ولا ايه …
_ استني بس احنا لسه شوفنا البيبي التاني المشكله انه قافل رجلة مش مبين حاجه هيبان المرة الجاية
= لا يا دكتور ارجوك شوفلي التاني ليه انا لازم اتأكد …
_ لازم تتأكدي ليه لسه بدري عالولاده اتفضلي انتي يامدام كوثر نتطمن عالبيبي…
= ماشي يادكتور انا مش فارق معايا بنت ولا ولد اهم حاجه يبقي طفل سليم معافي….
