حكاية ريهام

حكايه ريهام
ببيع ليمون في الشارع اخدني في عربيته وعمل معايا الي محدش يتخيله
انا اسمي ريهام عايشه مع امي وابويا واتنين اخوات بنات واخ ولد .. عايشين حياه تحت خط الفقر..
من يوم موعينا علي الدنيا عايشين في عشه
في مكان فاضي بعيد عن الناس .. منفيين ..
اقرب قريه لنا بنشوف بيوتها من بعيد وعلشان نوصل لها ناخد ربع ساعه مشي.. بس احنا ممنوع نروح هناك او نعيش وسطهم..
انا واخواتي 
من صغرنا واحنا منبوذين بس منعرفش السبب.. بس لما بدانا نكبر ونفهم وقتها عرفنا السبب الحقيقي
الي عرفناه ان امي زمان كانت رقاصه في الموالد .. وعندنا في الريف الرقاصه دي واحده ملهاش كرامه ولا شرف
ابويا حبها زمان و قرر يتجوزها وتبطل رقص .. هي كانت يتيمه ومقطوعه من شجره ملهاش حد ومن يوم ما فتحت عينيها علي الدنيا اتربت في ملجا.. واول مكبرت دورت علي شغل كتير ملقتش وكانت بترقص علشان تصرف علي نفسها وكانت تتمني تسيب الشغلانه دي.. علشانكده فرحت جدا لما بابا عرض عليها يتجوزها وتبطل رقص
اهل ابويا رفضو الجوازه دي ولما لقوه مصمم قالو له لا تعرفنا ولا نعرفك ولو مصمم تتجوزها انسانا خالص
ابويا كان شايف امي انسانه كويسه وشكلها بنت ناس مش وش بهدله.. قرر يتجوزها رغم معارضه اهله … وفعلا اتجوزها وعاشو هنا في القريه .. بس الناس مسابوهمش في حالهم.. متقبلوش ان امي الرقاصه. تسكن معاهم … فضلو طول الوقت .. الرقاصه راحت الرقاصه جت.. جوز الرقاصه راح جوز الرقاصه جه.. وكلام جارح كتير
كل ستات القريه كانو بيكرهو امي .. دايما شايفين فيها الرقاصه الي هتخطف رجالتهم منهم..مكانش حد عامل احترام او تقدير لابويا
بعد فتره امي حملت في اخويا الكبير وقتها بابا قال مينفعش ابني الي جاي يعيش يسمع الكلام ده عن امه.. وقتها بابا اخد القرار واخد ماما ولمو حاجتهم وراحو قريه بعيده محدش يعرفهم فيها وقررو يعيشو بعيد عن الناس وجابو اخويا الكبير وبعده جابوني انا وبعد كدهجابو بنتين توام .. وعيشنا ولا نعرف حد ولا حد يعرفنا ولا نتكلم مع حد
كان بابا بيشتغل ويجيب لنا اكل .. بس اكل علي اد الحال .. عيش وفول ..او عيش وجبنه واوقات بيكون عيش حاف
كبرنا واحنا راضيين بعيشتنا.. ابويا وامي ربونا علي القناعه والرضا.. عمرنا مانبص لحاجه في ايد غيرنا ولا نفكر غيرنا عايش ازاي واحنا عايشين ازاي.. وفعلا الحمد لله عمرنا ما طمعنا في حاجه مع حد
اخويا اول ما كمل ١٧سنه سابنا ومشي ومعرفناش عنه حاجه.. بابا فضل يدور ويسال عليه بس من غير فايده .. امي تعبت من الزعل علي اخويا .. وبعدها بشويه ابويا تعب ومبقاش قادر يشتغل 
كان عمري وقتها ١٥سنه واخواتي ١٢ سنه