الوصية كتابة مروة عزام

الموقف كان صعب اوي لدرجة ان مصطفى اول ما خلص قراية واتأكد من الكلام المكتوب ساب المكتب ومشى على طول من غير ماينطق ولا كلمة..

رَوَحت من عند المحامي وانا التفكير هيموتني معرفتش انام من كتر القلق والخوف، رد فعل مصطفى كان غامض ..
انا حاسة انه ممكن يستغنى عن الفلوس عشان خاطر مايتجوزنيش وساعتها هتبقى صدمة وإهانة كبيرة ليا..

فات ساعتين وانا على نفس الوضع لغاية مالقيت رسالة من المحامي على موبايلي بيطمني: 
” مصطفى كلمني دلوقت وقالي انه موافق على الشرط اللي في الوصية بس هو خايف لا تكوني انتي اللي مش موافقة”.

ردت فيا الروح اول ما قريت الكلام دة، انتظرت شوية لغاية مافكرت في إجابة و بعدين كتبتله:
” قوله هي مش موافقة، وقوله كمان ان الفلوس ماتهمنيش وان اهم حاجة عنديان يوم ما اتجوز ارتبط بالانسان اللي احبه ويحبني بعيد عن اي ماديات”..

رد عليا المحامي بأيموشن بيضحك مش فاهمة قصده ايه، لكن مش مهم، المهم ان مصطفى بعتلي وقالي:
– هو انتي لغاية دلوقت لسة مش متأكدة إذا كنت بحبك ولا لأ
ابتسمت و ضحكت كنت مبسوطة انه لغاية دلوقت لسة بيحبني، (وتقريبا دي كانت اخر ضحكة اضحكها قبل ماعرف اللي هيحصلي).

= عارفة طبعا انك بتحبني بس خايفة تكون لسة زعلان وشايل مني

– لا مش زعلان وياريت ننسى اللي فات ومانتكلمش فيه تاني 
..

مصطفى عرف يخليني احبه واتعلق بيه في فترة صغيرة اوي، خروجات، فسح، هدايا، عرف السكة اللي يوصل بيها لقلبي وفعلا اتعلقت بيه جدا ماكنش بيمر يوم غير مابنشوف فيه بعض وكنت متخيلة فعلا انه قدر ينسى اللي فات و اني بقيت بالنسبةله كل حاجة في حياته..
حسسني انه مش قادر يستغنى عني وانه مضايق اوي ان لسة اجراءات الميراث هتطول وهنفضل بعيد عن بعض..
فاقترح ان احنا نتجوز سريع من غير ما حد يعرف 
وبعد ما الاجراءات كلها تخلص نعمل فرح كبير ونعزم الناس كلها..

ماسبليش فرصة افكر او ارفض اخدني على مكتب المحامي و كتبنا عقد جواز وطلعنا بعدها على شقته..

طبعا انا كنت فرحانة ان الخطة اللي رسمتها مع المحامي بدأت تتحق على ارض الواقع وبقى معايا عقد جواز..

عيشت يوميها احلى ليلة في حياتي لدرجة كنت خايفة احسد نفسي من كتر الفرحة اللي انا فيها..
لكن اول ما صحيت من النوم مالقتهوش جنبي ..
اتخضيت جامد بس قلت اكيد قام يحضرلي الفطار زي مابشوف في الافلام ماهو بيعتبرني ملكة قلبه وكيانه 
وهو الامير اللي هيحققليكل احلامي، بس لقيت مكانه في السرير جواب فتحته اقرا اللي فيه:

 صباح الخير يا حياتي …
            إنتي طالق
ههههههه هو إنتي صدقتي بجد ان ممكن انسى بسهولة كل اللي عملتيه فية، سنتين  ضاعوا من عمري بسببك ..
لعبتي بعواطفي ومشاعري وفي الاخر هزئتيني وجرحتيني قدام الناس كلها ومن ساعتها صممت اخليكي انتي اللي تجري ورايا وتتمني تتجوزيني وماكنش قدامي غير سكة واحدة هي جدي فضلت جنبه ورعيته في مرضه لغاية ما شاف ان انا احق واحد بفلوسه..
الطمع خلاكي تفتكري ان المحامي يقدر يغير في الوصية  بالساهل وماخدتيش بالك ان المحامي دة يبقى صاحبي وصديق عمري وكل اللي حصل دة كان باتفاق بينا..
اه بالمناسبة نسيت اشكرك على نص البيت اللي كتبتيه للمحاميهو بقى باسمي دلوقت..

تمت..