نوفيلا سمارة بقلم فطيمه يوسف

خلص سمير غسيل العربيه ومشي مع ابوه للسوق واثناء ما هم بينقوا الحاجات البايع بيبص على سمير وعينه بتزوغ عليه وهو بيقول له لما لقى ابوهم انشغل عنه في حته تانيه 
شكل الايادي الناعمه دي ما تدلش على لبسك يا جدع هو انت صنفك ايه بالظبط ولا عينيك دول عينيك يدوبوا اجدعها شنب انا شاكك فيك ياض .
زهق سمير من كلام البيع اللي كل ما يجي عنده يشتري الخضار يقول له الكلمتين دول وابوه ما بيرضاش يشتري غير منه عشان بيبيع لهم بسعر رخيص عن السوق كله 
جرى ايه يا عم الفكهاني هو انت كل اما هتشوفني هتقول لي الكلمتين دول عاد خلقه ربنا هتعترض انت كمان على خلقه ربنا .
البايع لعب في شنبه ورد على سمير وهو بيهز في حواجبه 
والله الصوت بتاعك ياض ولا المغنواتيه ما تيجي تشتغل عندي وانا ابسطك واروقك واسيبك من الشغل مع ابوك وهدي لك يوميه ضعف اللي ابوك هيديها لك مرتين ثلاثه .
رمى سمير الرمان اللي كان بينقيه وحدف في الكيس في وش البيع 
يا فتاح يا عليم يا
رزاق يا كريم اني بقى مش هشتري منك عاد ولا هاجي ناحيه فرشتك دي تاني علشان انت راجل قليل الادب وشكلك أكده من إياهم .
حاول البيع يمسك ايده وهو بيترجاه ميمشيش 
أيوه عليك يا صعيدي استنى بس يا مسكر انت واخد على خاطرك ليه بسرعه خلي خلقك واسع ما تبقاش نرفوز كده ده حتى هنا اسكندريه هواها وبحرها وجوها يقولوا ان الناس لازم تكون اعصابها رايقه وهاديه ولا تزعل نفسك نقي الرمان هديه مني ليك .
نفض سمير ايديه وهو بيدي له بالكوميه في صدره وبيبص له بعينين حادتين 
انت زي ما قلت يا صعيدي عوايدنا مش زي عوايدكم اهنه في اسكندريه وان يدك دي اتمدت عليا يا تاني هخليك تبقى مسخره في سوق الخضار وهخلي اللي ما يشتري يتفرج عليك النهارده .
البايع ما هموش كلام سمير ومسك ايده اللي بيخبط بيها على صدره
يا سلام على الحمشنه يا سلام على المجدعه اللي هتبظ من لسانك بظ يا جدع هو انا طول تفرج عليا السوق اي حاجه منك حلوه يا جميل .
سمير جز على اسنانه پغضب من برود البايع معاه وساب المكان وروح لابوه وابوه اول ما شافه جاي فاضي 
كالعاده المسخه بتاعتك تقف تقر ساعتين مع البيعين وما تجيبش حاجه واني اللي افضل الف على كعوب رجلي طول النهار في السوق عشان اجيب طلبات البيت والست الكبيره وانت مش شاطر غير في اللت والعجن ما جبتش الحاجه من الفكهاني ليه يا سمير
سمير كان بيبص على الفكهاني اللي بيبص له بنفس النظره اللي بتخليه يشمئز منه وهو بيقول لابوه 
الفكهاني دي يابا راجل مش مظبوط واني ما هقفش عنديه ثاني واصل انا ما فاهمش انت ليه هتخليني اجيب من ده بالذات مع اني هقول لك ان كل مره هيضايقني بالكلام وانت برده تخليني اجيب من عنديه .
مسكوه ابوه من لياقه قميصه 
بيديك كتير وسعر رخيص عن السوق كله واني هستفاد من فرق السعر وهحطه في جيبي يا غشيم انت ومش هنجيب غير منه يلا غور هات منه الفاكهه اللي الست قالت لك عليها عشان انت زهقتني 
دبدب سمير في الأرض من اوامر ابوه اللي بتغصبه دايما على كل حاجه 
خلاص يا ابوي روح انت هات منه الفاكهه واني هجيب الفراخ من الراجل وهفضل وياك لحد ما يخلصها .
ابوه بتصميم 
لا مش هروح اجيب منه انت اللي هتجيب بيديك اكثر مني وبسعر اقل مني ده راجل غتت ولو طولت معاه ممكن ادي له كفين على وشه ونفرج الناس علينا وخلص بقى .
مشي سمير من قدامه ورجع للفكهاني وهو هينفذ اوامر ابوه من غير اي اعتراض زي كل مره 
خلصي وزن الحاجات اللي قلت لك عليها من غير كلام يا اما هدب صوابعي ال 10 دول في عينيك اللي عايزين يتخزقوا دول .