رميت مراتي في الشارع ل نور محمد
دعاء اتجهت ناحية الباب وحطت إيدها على الأكرة ولفت وشها لينا وقالت جملة نزلت عليا زي الصاعقة
لا يا حماتي.. الموضوع مش حمل. الموضوع يخص الأرض اللي محمود باع دهبى عشان يشتريها ويكتبها باسمه.. ويخص الوصلات اللي أمك مضت عليها عشان تاخد القرض.. أنتو نسيتوا إن الورق كله معايا ونسيتوا أنا مين
أمي وشها اتخطف ولونها بقى زي الكركم واللب وقع من إيدها صرخت وقالت
يا نهار أسود! الورق فين يا بت
دعاء فتحت الباب والهوا الساقع دخل البيت وقالت بابتسامة نصر
الورق في الحفظ والصون.. والصبح مش ورقة طلاقي اللي هتوصل
ده المحضر هو اللي هيوصلكم لحد هنا.
ورزعت الباب وراها رزعة هزت حيطان البيت وهزت رجولتي المزيفة معاها.
أمي جريت عليا وهي بتلطم على وشها إلحق مراتك يا محمود! دي هتحبسني.. دي معاها شيكات ومستندات تودينا في داهية! إجري بوس إيدها ورجعها!
جريت حافي على السلم ورا مراتي اللي طردتها من دقيقتين.. بس لما نزلت الشارع.. ملقتهاش! الشارع كان فاضي وضلمة وكأن الأرض انشقت وبلعتها..
وفجأة تليفوني رن.. رقم غريب.. رديت وأنا بلهث ألو.. دعاء
جاني صوت راجل خشن بيقول
المدام دعاء معانا في القسم يا أستاذ.. وعاملة محضر تعدي وطرد ومعاها ورق يخص والدتك.. شرفنا حالا.
يا ترى محمود هيعمل إيه وهل دعاء فعلا هتنتقم ولا دي قرصة ودن
والأهم.. إيه سر الورق اللي قلب حماته من فرعون لكتكوت مبلول
لو عايز تعرف باقي الأحداث والمفاجأة اللي حصلت في القسم..
الكاتبه_نور_محمد
الجزء الثاني سقوط الأقنعة.. وعزة النفس
وصلت القسموأنا بلهث وركبي بتخبط في
بعضها. أمي كانت سابقة بخطوة بس مش مشية الست الكبيرة اللي بتمشي تهز الأرض لأ.. كانت ماشية بتجر رجليها والخوف كاسر عنيها.
دخلنا المكتب ولقيت دعاء قاعدة.. بس مش دي دعاء اللي كانت بتعيط وبتبوس الإيدين من ساعة. كانت قاعدة حاطة رجل على رجل وشها مغسول من الدموع وعنيها فيها نظرة قوة أول مرة أشوفها. المحامي بتاعها كان قاعد جنبها وقدام الظابط ملف مفتوح.
الظابط بص لأمي وقال بجمود
المدام مقدمة فيكي بلاغ بتبديد إيصالات أمانة ومقدمة صور من الشيكات اللي بتمضيكي عليها عشان القرض وفيه شهود من الجيران إنك طردتيها في نص الليل وهي حامل.. التهم دي كفيلة تبيتكم في الحجز النهاردة.
أمي الست الجبارة انهارت ووقعت على ركبها قدام دعاء وهي بتعيط بحرقة
يا بنتي.. يا دعاء يا حبيبتي ده كان شيطان ودخل بينا! إحنا أهل والظفر مايطلعش من اللحم. أنا زي أمك هتحبسي أم جوزك وجدة ابنك
دعاء بصت لها ببرود وقالت بصوتهادي زلزلني
شيطان ولا جبروت لما رميتيني في الشارع الساعة 2 بالليل مكنتش زي أمك لما قولتي لابنك يطلقني ويرميني مكنتش جدة ابنه أنتو اللي قطعتوا اللحم ورميتوه للكلاب.. ودلوقتي جايين تدوروا على الأصول
أنا قربت منها وحاولت أمسك إيدها
دعاء.. عشان خاطري بلاش فضايح إحنا لسه متطلقناش والطفل اللي جاي ده ملوش ذنب.
دعاء سحبت إيدها بقرف وقالت
الطفل ده هيتربى بعيد عن الظلم. أنا مش هتنازل عن المحضر إلا بشرط واحد.
أمي صرخت بلهفة أي شرط يا بنتي.. أي حاجة بس بلاش الحبس!
دعاء وقفت وقالت بصرامة
الشقة اللي أنا اتطردت منها.. تتكتب باسمي دلوقتي حالا عقد بيع وشراء خالص وتتكتب ورقة رسمية إن ملكش حق تدخلي الشقة دي تاني ولا أمك تعتب عتبتها والطلاق يتم دلوقتي وبهدوء وكل حقوقي ومؤخري ونفقة ابني توصلني.. يا إما المحضر يمشي في مجراه والصبح أمك تترحل على النيابة.
أمي بصتلي وهي بتترعش وافق يا محمود.. وافق
