روايه حكايه سهام البارت الاول

وامة اللي عايشة مع اخوها في البحيرة من ساعة ما ابو سيد ما مات

سيد وحيد امة وملوش اهل هنا وامة بسبب مشاكلها معاه سابتة وراحت عاشت مع اخوها في بلدهم. البحيرة

الزغاريط اشتغلت من مامتي والجيران اللي جاية تجامل والأغاني والهيصة. واخويا حسن كان عمال رايح جاي يسلم علي دي ويسلم علي ده ويجيب ساقع لدي وساقع لده

والليلة بقت ولا المهرجان

شوية وسيد لبسني الشبكة وسط زغاريط كل اللي موجودين وامي ل اول مرة في حياتها قامت رقصت. واخويا قام رقص معاها. وبعدين اخويا شدني من ايدي ورقصني معاهم

الليلة كانت من اجمل ليالي عمري بجد

شوفت فرحة امي وفرحة اخويا في عيونهم ورقصهم حسيت قد ايه ان ليا اهل بجد بيحبوني وفرحنين لفرحي

مقدرتش امسك نفسي والدموع نزلت من عيني وكنت بداريها بسرعة علشان محدش ياخد بالة يفتكرني مش مبسوطة

علي الساعة 12 كانت الليلة خلصت والمعازيم كلهم مشيوا حتي ام سيد واخوها راحو يباتوا في شقة سيد بعد ما امي عشتهم ومرضيتش تخليهم يمشوا من غير ما ياخدو واجبهم

وسيد بعد ما اتعشي وقعدنا مع بعض لغاية الساعة واحدة بالليل مشي هو كمان وروح بيتهم

بعد ما الليلة خلصت كنت خلاص حاسة اني ميتة من التعب وماما كمان واخويا

الكل تعب في اليوم ده وبالأخص ماما

لانها كانت شايلة كل حاجة طبعا صحابي ساعدوها بس هي كتر خيرها قامت بكل حاجة لوحدها تعتبر

الكل ما صدق ما راح علي سريرة وماصدق ينااااااام

صحيت انا علي الضهر ملقتش حد في الشقة ماما راحت فرشة الخضار من الصبح بدري واخويا راح علي شغلة بعد اجازة طويلة

روقت الشقة اللي كانت عاملة زي الخرابة من الفرح بتاع امبارح

وغسلت الاطباق وخليت الشقة تبرق

وبعدين لبست هدومي وقولت اخرج اشتري شوية طلبات للبيت

خرجت الشارع لقيت سيد واقف علي الناصية مع زفت الطين اللي اسمة رجب وماسك في ايدو سيجارة حشيش بيشربها هو وسيد

نديت علي سيد اللي اول ما شافني جالي بسرعة

سيد :: قمري وقلبي سهام

انا :: سيد مش ناوي تقطع علاقتك بالزفت رجب ده

سيد :: هو مزعلك في حاجة وربنا اروح اشق بطنة نصين