روايه حكايه سهام البارت الاول

وبعد ما حسن شاف الهدوم دخلت قستها وفرجتة عليها وانا لابساها وعجبتة جدا وبعدين دخلت تاني قلعتها ولبست هدوم البيت

مر اليومين كأنهم سنتين وفي اليوم اللي هنشتري فيه الشبكة بتاعتي صحيت الصبح فطرت اخويا وبعدين نزل القهوة علشان يشوف صاحب الشغل علشان ياخد منة فلوس سلف

وامي فطرتها وعلي العصر كدة اخويا حسن جه وقالي البسي هدومك علشان تروحي انتي وامك مع سيد علشان تشتروا الشبكة بتاعتك

فعلا لبست هدومي وسيد جه اخدنا وروحنا للجوهرجي اللي بعد مننا بأربع شوارع واشترينا الشبكة ورغم بساطتها. الا اني كنت مبسوطة جدا بيها

وكانت عبارة عن دبلة ومحبس وغويشة وبعد كدة روحنا اشترينا دبلة فضة له ورجعنا

سيد بعد ما وصلني البيت. وقف هو مع صحابة علي ناصية الشارع زي ما متعود وبصراحة كان له صاحب اسمة رجب مكنتش بطيق اشوف شكلة

عيل صايع وشمام وعلي طول بيعاكس في اللي رايحة واللي جاية

كان شكلة شكل سوابق .. وكان واقف علي الناصية وسيد راح وقف معاه

دخلت انا البيت وفرجنا حسن اخويا علي الشبكة. وقالي حلوة. وكنت حاسة انة من جواه زعلان وقالي بكرة ظروف سيد تتعدل ويجبلك احسن منها

انا بصراحة مكنش فارق معايا الدهب فرحتي كانت اكبر من اني ابص علي حاجة زي كدة..

تاني يوم… يوم الشبكة صحيت بدري وصحباتي البنات اللي في شارعنا جو الصبح بدري علشان يقفوا معايا في ليلتي و يعملوا الواجب

كان ليا صاحبة كانت معايا من اول ما جينا المنطقة. وكبرنا مع بعض وبقت صاحبة عمري كان اسمها شيماء

شيماء دي تقريبا في نفس سني. بس كان عليها لسان ياساتر محدش كان بيعرف يسلك معاها او يخد منها حق ولا باطل .. بس كانت جدعة اوووي

مشكلتها الوحيدة انها بتحب تصاحب وتمشي مع الشباب ومفيش عندها حاجة اسمها عيب وكانت ديما بتحكيلي عن مغامراتها مع الشباب

وللاسف مكنتش بنت بنوت

المهم شيماء جت علشان تزوقني مع صاحبتي منال اللي شغالة في الكوافير اللي جنب بيتنا

وكانوا مشغالين اغاني وبيرقصوا وبيهيصوا وانا كنت فرحانة اوووي لاني خلاص هبقي عروسة وهلبس شبكتي الليلة

علي بعد العصر كدة بساعة كنت خلصت ومش فاضل غير ان سيد يجي لكن كان الوقت لسة بدري ومنال صاحبتي فضلت معايا علشان لو المكياج جرالة حاجة هي تظبطة

بعد ساعتين من الأنتظار والرقص والهيصة سيد خطيبي جة وهو لابس ومتشيك ومعاه خالة اللي جه من البلد